Ministri i Punëve të Brendshme, Besfort Lamallari shprehu sot mirënjohjen për dy efektivët e Policisë së Shkodrës që falë ndërhyrjes së tyre të menjëhershme, i shpëtuan jetën një gruaje që tentoi të vetëmbytej në ujërat e Bunës.

“Në ato çaste kur çdo sekondë bën diferencën Erixhon Senko dhe Francesko Hoxha zgjodhën të veprojnë pa hezitim, duke vënë jetën e tyre në rrezik për të shpëtuar një tjetër”, tha Lamallari në një postim në rrjetet sociale.

Ministri Lamallari u shpreh se “ky është misioni më i lartë i uniformës: të jesh aty kur qytetarët kanë më shumë nevojë. Krenar për ju! Shembulli juaj është dëshmi e qartë se shërbimi ndaj qytetarëve nuk është thjesht detyrë, por thirrje dhe guxim”.

Një 59-vjeçare u shpëtua sot nga forcat e policisë, pasi tentoi të vetëmbytej në ujërat e lumit Buna. Patrulla e Përgjithshme e Komisariatit të Policisë Shkodër kanë shkuar në vendngjarje dhe kanë hyrë në ujë, duke bërë të mundur nxjerrjen e 59-vjeçares nga ujërat e lumit Buna, në gjendje të rëndë, por me shenja jete, si dhe i kanë dhënë ndihmën e parë.